新民黨噚日為佢哋嘅維園年宵攤檔開幕，開幕禮都幾人丁單薄，身為主席嘅葉劉淑儀（圖）話，由於佢哋個黨嘅立法會議員、早排生完BB嘅容海恩家陣仲要坐月，所以先至嚟唔到，仲透露佢諗過幫BB改咩名好。
葉劉話，既然爸爸叫袁彌昌，不如BB叫「袁昌妮」，英文名直頭就叫Cherry。可惜葉太跟住話，袁生袁太都對BB名相當講究，所以無用到。
講番嚟緊嘅豬年，葉太即時提早拜年，祝市民豬籠入水、身體健康，市民諸事大吉，佢亦希望政府政通人和，新民黨黨務興隆，之後佢即席揮毫，幫市民寫揮春兼推銷豬年精品，佢話年宵冇乜籌款目標，因為個黨喺4月先有大型籌款活動喎。