每次有人嚟巡之前就會洗太平地！令到病房睇落去冇咁多病人！高層冇可能睇到真實情況！病床之間，空間窄到連布簾都拉唔到，連放病人物品嘅空間都冇，食飯冇枱用！
防感染做唔到，做嘢嘅時候身上面件工作服同病床「hi」嚟「hi」去，呀婆一隻手伸過去已經掂到隔籬張床，有時遇着啲亂嘅呀婆，隨時拔走人哋啲喉都得！免疫力低嘅人，有時都要瞓喺啲有傳染性嘅病人隔籬，因為已經冇床位可以安排到！
拖板又一地都係，一啲都唔安全，一個唔小心倒瀉水落個拖板度真係可以電得死人！
買返嚟啲新床又係大倒退，冇得插電要用人手校高校低，傷手腕傷腰骨之餘，病人想坐起身或者瞓低都要等！
啲文件重重複複又冇實際用途，浪費時間去填表之餘，仲浪費好多紙張，高層覺得護理質素會喺啲表格上面反映得到，但實際係護士為咗去填嗰堆表少咗時間去護理病人，本末倒置。
伊利沙伯醫院內科護士