今年年宵市場噚日正式開始，社民連攤檔架起著名政治漫畫家尊子設計嘅佈景板，諷刺民望插水嘅特首林鄭月娥、放生前特首梁振英嘅律政司司長鄭若驊以及鼓吹人道毀滅野豬嘅梁振英。
佈景板上鄭若驊大劍一揮斬開綁着梁振英嘅鐵鏈，旁邊寫着「好豪放」，寸爆鄭放生自己僭建同埋689嘅UGL案，林鄭月娥則拗斷一支枴杖，嘲諷「好打得」嘅林鄭臨過年收緊長者綜援。社民連主席吳文遠仲為此「耍冧」：「唔好意思，新年流流放出維園三煞，篤眼篤鼻。」
眾志爆公安部干預
至於今年再喺印製產品時受干預嘅香港眾志，主席林朗彥噚日喺佢哋年宵攤位開檔時再爆料，話同本地承製公司了解後，知道係有來自公安部批文，禁止內地廠房印眾志個名同標誌，質疑內地當局有相關黑名單，針對佢哋。