星期二亞洲盃四強爆發海灣地區內戰，一對中東世仇狹路相逢，結果主辦國阿聯酋慘吞卡塔爾四蛋出局。不過，比賽由唱國歌開始已經火藥味十足，及後有東道主球迷眼見仇家喺自己國土耀武揚威，仲向入波嘅卡塔爾球員掟鞋同水樽！
噓國歌掟鞋掟樽兼批踭
卡塔爾同周邊嘅海灣國家關係一向唔係好，2017年更因為被指支援恐怖分子，爆發外交危機，俾沙地阿拉伯、巴林、埃及同埋阿聯酋斷交同圍堵，到家陣都無和好迹象。兩軍今次喺四強碰頭，因為阿聯酋唔畀卡塔爾國民入境，所以只得少數卡塔爾記者可以入場。另外主辦單位向阿聯酋國民派波飛，實行逼爆主場，結果播卡塔爾國歌嗰陣，現場即刻噓聲四起。
不過，作客嘅卡塔爾好快就用表現叫現場嘅球迷收聲，上半場22分鐘中場古禾夏右路推進，並喺阿聯酋守衞力壓之下射門，個波其實冇乜威脅，點知阿聯酋門將艾沙竟然犯低級錯誤漏入，被對手領先1:0。到37分鐘，大勇嘅卡塔爾前鋒艾莫斯阿里左路殺入禁區起腳射遠柱入網，幫球隊領先到2:0。入波之後超興奮嘅佢仲唔識死喺場邊大肆慶祝，主場球迷當然眼火爆，紛紛除鞋掟入場內，要工作人員即刻出手制止。
亞洲盃過半教練唔撈
換邊之後繼續係卡塔爾嘅世界，到80分鐘隊長艾希度斯再建一功，領先到3:0。之後阿聯酋嘅中堅阿密特向卡塔爾球員批踭，球證翻睇VAR後向佢出示紅牌。打多個嘅卡塔爾之後有哈美迪埋齋，最終以4:0大勝阿聯酋，球隊史上首次殺入亞洲盃決賽，將會喺星期五大戰日本爭冠軍。
雖然兩國牙齒印多多，不過就有唔少阿聯酋網友都不恥主場球迷噓人哋國歌兼掟鞋掟水樽，仲話實在係太唔尊重對手。比賽之後，阿聯酋主帥沙哲朗尼就因大敗向球迷致歉，而佢同阿聯酋足協嘅合約亦都到期，將會離任。有趣嘅係，連同納比、艾歷臣，基羅斯呢班名帥，今屆亞洲盃已經有過一半球隊嘅教練辭職唔撈。
知多啲：兩國牙齒印多籮籮
一直以嚟，卡塔爾都係親伊朗政權，同沙地阿拉伯、阿聯酋等海灣國家背道而馳。喺2014年，卡塔爾因為支持埃及嘅穆斯林兄弟會政府，同支持推翻政府嘅阿聯酋相反，結果阿聯酋政府撤回駐卡塔爾大使。至於喺2017年，卡塔爾被指支援恐怖活動，阿聯酋隨即同佢斷交，仲驅逐國內嘅卡塔爾國民出境，另外禁止卡塔爾國民入境，除此之外，阿聯酋亦封鎖埋卡塔爾嘅領空同領海。