立法會噚日舉行捐血活動，唔知係咪流感高𥧌期，唔少議員都中咗招，所以反應似乎比較冷淡，不過就算議員想捐都唔一定可以捐，好似專業議政莫乃光同民建聯柯創盛，各自因唔同嘅理由畀紅十字會姑娘「DQ」，唔接受佢哋捐血。
Tanya捐完開會頂得住
朝早去捐血議員比較少，包括公民黨議員陳淑莊（Tanya）同新民主同盟范國威；仲有建制派唯一現身嘅民建聯柯創盛。Tanya透露過去都有捐血習慣，今次已經係自己第17次捐血，平日多數喺銅鑼灣捐血嘅Tanya話，該處嘅姑娘早前話佢知，周日好多印傭三五成群去銅鑼灣捐血站捐血，係香港一個好主要同穩定嘅血液來源，令佢好感動同好感謝。問及捐血後仲應唔應付到今日立法會會議？Tanya笑言由於噚日冇機會喺質詢環節質問娥特，冇乜機會動氣，所以一定頂得住。
至於柯創盛就話自己一年都會捐兩三次血，噚日由於感冒初起，姑娘話出於風險管理，叫佢遲兩個星期先再捐。其實紅十字會網頁都有好多捐血須知，其中都有講明，如果過去十日患有感冒，如有發燒、咳嗽、喉嚨痛等症狀，不宜捐血；如果冇發燒，康復及停藥後一星期就可以捐血（以較後者為準）；如果曾經發燒，就要暫緩捐血兩星期，柯創盛似乎要留意嘞！
而民主派會議召集人毛孟靜、公民黨譚文豪同專業議政莫乃光，建制派則有工聯會何啟明同金融界陳振英到咗午飯時間就去捐血，但莫乃光因為年初去咗泰國，至今返港僅差一日先夠28日，同樣被DQ；而毛孟靜因為去年8月時去過墨西哥，所以只有血漿獲採用。
李八方