終審法院非常任法官包致金又再推出新書，今次係佢第三本有關法律、法治嘅漫畫書，佢噚日傍晚現身交易廣場書店舉行簽名會。前政務司司長陳方安生、大律師公會前主席李志喜、公民黨創黨黨魁余若薇同民主黨創黨主席兼資深大律師李柱銘都親身到場買書兼攞簽名，余若薇仲十足小粉絲咁，不停趁包致金低頭簽名時拎起手機自拍（圖）。
包致金呢本書吸引咗幾十人逼爆書店搶購，由6點簽書簽到7點半，包致金話本書有重點概念就係自由與民主，但佢更在意令外界明白法律為何物。呢本書一幅漫畫配一篇文章，深入淺出，難怪馬丁一買買三本，話要送畀朋友，仲話一日睇一啲都幾過癮，不過睇真啲，每本盛惠400大元，認真唔平㗎！