星期一亞洲盃首場四強賽事，西亞勁旅伊朗喺下半場犯下「小學雞」錯誤，結果俾日本以3:0淘汰。
上半場雙方互交白卷，不過下半場日本嘅一次反擊，伊朗守將卡納尼喺禁區外踢跌日本前鋒南野拓實，伊朗球員隨即以為球證吹罰，多達五名守將跑向球證投訴，無人看管嘅南野拓實喺底線前傳中，大迫勇也接應近門輕鬆頂入，幫日本喺56分鐘領先1:0；踢到67分鐘，伊朗犯手球被罰12碼，大迫勇也操刀射入梅開二度，幫日本領先到2:0。
心急進攻嘅伊朗之後大軍壓上，但一直威脅唔到日本，到補時階段，日本前鋒原口元氣個人突破後殺入禁區破網，正式宣佈伊朗出局，而大勝三球嘅日本就率先殺入決賽，為該國史上第五個亞洲盃冠軍進發。