中環來回赤鱲角一向依賴機鐵，旅程只需廿零分鐘，又快捷又舒適，對我這種坐車隨時會暈浪的關愛座殘弱人士來講，簡直恩同再造。但那天東京航班誤點，抵港已經凌晨三時，除了搭的士別無他法，只好拖行李去的士站，硬着頭皮上車。我的法國朋友M女士其他方面鴻運當頭，貴人多不勝數，唯獨香港的士大佬和她有仇，十次有九次半都鬧得黑面而散，聽她敘述現代《聊齋誌異》聽得多，難免留下陰影，一面準備嘔袋一面考察司機品格，真是一項沉重的心理負擔。未上車主持大局的地勤人員問我目的地，如實作答後遞來一張字條，寫明車費若干，我以為和巴黎一樣出市中心價錢固定，見司機哥哥起錶，不禁咦了一聲，以「大鄉里出城有怪莫怪」作開場白，向他展開查詢。原來那個價目只是估計，以便乘客有個譜，抵埗時減低拗撬或然率──如此文明，非常抵讚。話匣子既然打開，我順勢報定案，告訴他基於健康理由，途中可能需要吃餅乾活躍胃部，希望他不介意，他打了個爽朗的哈哈，顯然性格樂天，教我放下心來。
隔兩天讀到一則新聞，有位女士三更半夜由機場坐的士歸家，車費四百司機說五百元鈔票冇得找，揚言載她返回赤鱲角，嚇到她打手機報警。謝主隆恩，我遇上這位不折不扣溫柔敦厚，過海前問行東隧抑或西隧，懵基才知道二者收費有別，「雖然西隧快啲，東隧平好多㗎，出公數就無所謂」，成田機場折騰了五小時，已經攰到不成人形，能夠快五分鐘就快五分鐘，於是揀了西隧，怕他睇唔起大花筒，落車時攞收據，扮唔使自己掏腰包。