曼聯地獄賽程加辣！星期一英足盃16強抽籤，曼聯咁唔好彩抽中作客車路士，難踢之餘更加令二月賽程變得更恐怖，事關呢場波會喺歐聯16強首回合迎戰巴黎聖日耳門（PSG），同英超主場鬥利物浦嘅中間，加埋二月尾另一波難打賽程，看守領隊蘇斯克查喺未來個半月真係要考大考喇！
家陣喺英超、歐聯同場英足盃3線作戰嘅曼聯會由2月12日開始，展開為期33日嘅地獄賽程。紅魔喺12號率先會喺歐聯16強迎戰PSG，四日後就會喺英足盃對衞冕嘅車仔，到24號就會返英超主場對榜首嘅利記。上星期曼聯中場連格仲話要快啲對利記報仇，唔知家陣仲有冇咁大口氣。
尼馬重傷紅魔笑晒
踢完呢三場後，曼聯就會繼續喺英超作客水晶宮同主場對修咸頓，跟住紅魔要喺11日內踢歐聯作客鬥PSG嘅16強次回合，之後英超作客阿仙奴，收尾就返奧脫福鬥曼城，咁搞法如果紅魔有乜差池，一個月內四大皆空其實唔難。
好彩嘅係，PSG頭號球星尼馬因為又傷蹠骨，極大機會踢唔到歐聯16強，甚至可能提早收「咧」，對曼聯梗係好消息。上任後各賽事八場贏晒嘅蘇B依然好有信心，仲暗寸熱刺同阿仙奴呢啲死對頭要求低：「聯賽爭前四唔係我哋嘅目標，我哋係曼聯，永遠都以聯賽冠軍做目標。我哋就算今季贏唔到，亦都會放眼將來，因為冠軍係我哋原本屬於嘅地方。」
蘇B：一個都不能少
蘇B仲話希望球隊今季至少要有一隻盃落袋㖭：「我哋仲踢緊歐聯同英足盃，單係爭前四肯定唔夠，我哋要問自己『今季係咪可以贏到錦標呢？』」要攞冠軍嘅話最緊要係乜？梗係唔係得把口，而係要齊腳！曼聯陣中就有桑馬達同安達靴里拉等一班球員未續約，可能會喺季尾以自由身走人，蘇B就強調紅魔一個都不能少，全部都要留低。《ESPN》就引述消息人士話，曼聯打算短期內同馬達續約一年，睇嚟蘇B真係冇吹水喎！