公關P安排午飯聚會，搵埋左丁山、主筆T與主播L到文華Clipper Lounge與一位來自新加坡之精英，跨國網站嘅高級董事會面。Clipper Lounge係中午茶聚會之地，三十幾年前當左丁山還是在金融界搵食之時，每星期總有一兩個下午在此與賓架、投資者、外國訪客、投資對象負責人等等在此飲下午茶傾談，當年寫字樓在聖佐治及怡和大廈，到Clipper最方便，好多中環人在此聚腳，故此被稱為To see and to be seen嘅地方。
離開金融界後，已不常來此飲茶，吃飯更少之又少，老友記約在文華食飯，不是在文華廳就是在Pierre或者扒房嘅嘞。三個星期前，在文華之遮打道門口，遇到常春藤Danny Lai（黎炳沛），佢居然一眼就認得左丁山，講咗一聲：「左先生你好耐冇嚟文華食飯咯喎！」咁鬼好記性，真係服咗佢，呢位先生在文華東方做咗47年（自1971年起），之前在中華電力跟過羅蘭士嘉道理爵士幾年，當然係香港五星酒店禮賓部之殿堂級人物，大概亦只有文華東方呢類咁傳統嘅酒店先至會唔畀佢退休。47年間，Danny在文華見盡不少香港及國際級風流人物，唔知佢肯唔肯寫回憶錄呢？
公關P在Clipper介紹，至知呢位跨國酒店網站公司高級董事亦來頭不小，以前係新加坡外交官，做過駐上海副總領事，係新加坡精英中之精英，每年新加坡政府考取外交人員，非自一流名牌大學之一級榮譽生，休想脫穎而出，而董事A肯毅然辭官投入酒店網站，當然係薪酬吸引，前途廣闊之故。呢間公司發源於微軟，後來當事人離開微軟，自行創業，總部仍在西雅圖，至今已雄霸全球旅遊網站，由訂機票、訂酒店、計劃行程，一手包辦，提供一條龍服務，傳統旅遊代理（agent）行業畀佢顛覆。不過慚愧嘞，左丁山對董事A話：「我係古老派，至今未試過上網買旅遊服務，三十幾年來都係打電話畀agent講幾句，由agent搞掂！」董事A笑笑口：「其實你嘅agent有好大機會搵我公司代辦一切！」主播L就係前衛人物，打開手機就有好多呢間旅遊酒店網站嘅資訊，現在去邊度旅行都係用電話搞掂，於是同董事A非常好傾。左丁山問董事A：「點解你地選新加坡為亞洲總部地點？」嘩，多嘢講咯，董事A話自己係新加坡人，無謂讚自己，但有好多歐美高管同佢講過，亞洲只有兩個選擇，香港或新加坡，選新加坡主要理由係外國高管可以負擔得起獨立屋花園洋房，子女融入國際學校，放假休閒地方多，打高爾夫球在市中心區，另外租甲級寫字樓有大把供應兼租金便宜過香港好多㖭！此皆拜填海取地之賜也。