維園年宵檔今日開鑼，唔少政黨各出奇謀搶佔公眾眼球，近年狙擊前特首梁振英UGL案不遺餘力嘅民主黨，今年推出唔少人開Party時都玩過嘅桌上遊戲「狼人」變種版《議事廳狼人》。新遊戲保留咗「狼人」嘅玩法，但角色就換上過去一年嚟最保皇、破壞香港最犀利嘅高官同建制派，似乎要喺維園屠狼！其他如大灣區、明日大嶼同國歌法，都係今年政黨年宵嘅主題產品，周庭仲濕身上陣演繹反填海嘅tee，極度瞓身。
狼人遊戲限量1,000套
白鴿黨嘅屠狼行動，「狼人」當然包括689本人，以及特首林鄭月娥、民建聯主席李慧琼同立法會主席梁君彥。其他角色方面，時事評論員蕭若元化身「預言家」，而浩鼎門「私通」689嘅民建聯議員周浩鼎就會變身「白痴」，入咗行會嘅前公民黨議員湯家驊化身「狐狸」，薯片叔叔曾俊華就係「巫師」。
有份設計《議事廳狼人》嘅白鴿黨創意媒體部部長黎敬瑋話，設計遊戲前已經確保冇侵權問題，希望大家喺新年聚會透過玩呢個遊戲，輕鬆討論香港政治問題。佢透露由於遊戲內容敏感，所以全部Made in Hong Kong。遊戲限量1,000套，每套定價88元，有興趣趁豬年屠狼嘅巿民不妨去幫襯。
其他民主派政黨亦趁推出多款諷刺時弊新產品，唔少成員因抗爭入獄嘅社民連推出型格Tee，包括印上「Failed Education Kills」字樣，控訴香港教育制度問題等嘅圖案Tee，仲有諷刺政府浪費一萬億公帑起人工島嘅Cushion；公民黨就推出頸位彎過大灣區嘅「大灣豬頸枕」，以及以「塑走膠官」為名嘅玻璃飲管連刷套裝，夠晒食腦兼食字！
成為政府重點打擊對象嘅香港眾志無懼《國歌法》，推出印上改編國歌歌詞嘅紙膠帶，又推出印上「100%自由」嘅理念旗，呼籲港人喺威權時代下，無畏無懼堅持信念，爭取無禁區同紅線嘅100%自由；唔少香港人鬧爆嘅明日大嶼計劃，眾志亦有產品呼應，就係印上「聽海哭的聲音」字樣嘅Tee，入水能游嘅周庭，濕身上陣示範點樣將呢件tee着得最完美。
李八方