工黨今年年宵以豬為題材，推出多款限量產品。其中一款更係自家設計膠紙，印有打工仔女心聲嘅膠紙，例如「打風後冇車搭，要返工是常識」等。工黨副主席麥德正話膠紙限量200卷，每卷賣30蚊。
工黨sell打工仔心聲
佢哋今年亦推出帆布袋，印有「打工仔唔好畀人賣豬仔」，寓意一眾打工仔女要自強。亦會賣不銹鋼飲管套裝，配有一支粗、幼飲管同埋洗飲管嘅刷，以支持走塑。帆布袋每個賣80蚊，而不銹鋼飲管就每套賣50蚊。全部都係限量200個，想入手嘅就可以到25至26號檔口。
區議會選舉將會喺11月舉行，社區幹事趙恩來就同八方講暫時未知派幾多人去選，要等黨內開咗會員大會先，大約暑假會有決定。有「逆權空姐」之稱嘅倡議幹事吳敏兒就話唔會參加區選，至於2020年的立法會選舉，她就講𠵱家太早決定，又話如果黨要求佢慎重考慮參加立會選舉，佢都會考慮，唔會一口拒絕喎。