中國首席前鋒武磊正式加盟愛斯賓奴！愛奴周日先至喺主場輸畀皇馬2:4，星期一就喺社交網站宣佈，武磊將着起24號波衫。報道指27歲嘅武磊，會同愛奴簽約三年，另加一年可續約嘅條款，人工就唔知道喇，由中資星輝互動娛樂股份有限公司擁有嘅愛奴，就負擔唔起「武球王」嘅簽字費，據講會將中國地區嘅肖像權畀返武磊頂檔。不過，據講以主帥魯比為首嘅教練團就認為武磊唔夠班，難喺西甲立足，講到明畀唔到出場時間佢，但係球會就一意孤行。另一憂慮係，武磊目前有肩傷，據報要唞成三個月咁多，有冇機會喺今季西甲亮相都成問題。
至於皇馬宿敵巴塞隆拿星期日作客基羅納，喺開波九分鐘就有尼爾遜施美度先開紀錄。到下半場早段，基羅納有貝拿度荷西被逐，踢多一人嘅巴塞喺68分鐘有美斯單刀輕鬆挑過對方門將建功，幫巴塞以2:0輕鬆贏波，仲以49分高居榜首。
