不知道是不是因為宮鬥劇煲得多，厲害國民耳濡目染之餘臉部肌肉訓練有素，去到邊都身不由己實踐「食乜屙乜」定律，普遍喜歡畀面色人睇，就算在餐館點菜，也絕對不饒無辜的服務員，有話不好好說，輕則粗聲粗氣，重則大呼小喝，看來蕭芳芳女士那本益智的《洋相》是時候出簡體字版了，硬性規定男女老幼踏出國門前必須一字不漏背誦，不及格不准上飛機。不過最令旁觀者感到不適的，倒不是王子公主們隨時隨地亂發大爺大媽脾氣，而是那種大量浪費食物的可恥作風，所謂冇咁大個頭學乜人戴咁大頂帽，既然冇咁大個胃，學乜人叫咁多嘢，全世界糧食供應告急，如此高調表演有錢大晒，毋庸因果論專家李碧華敲響警鐘，連不信蒼天不信鬼神的現世享樂者，都預感大嘥鬼遲早會有報應。怕只怕「共業」共到埋身，牽連我們這些一生堅守食得唔好嘥教條的一等良民，成世慳儉落得臨老冇啖好食的淒慘下場，嗚嗚嗚。
如果是自助餐，就更加眼冤，不論成年人或兒童，無一不以生霸死霸為己任，面前堆積如山的碗碗碟碟，吞掉十份之二三已經叫非常畀面，很難相信一個不久之前才經歷過大饑荒的民族，血淋淋的歷史教訓竟然毫不見效，一點也不懂得惜福。我們那代在殖民地生長的小朋友，雖然自幼困於鋼骨水泥，從未接觸身壯力健的耕田佬，卻一早由教科書獲得憫農指導，對勞動人民的景仰是否終將達到熱情擁抱階段尚在其次，粒粒皆辛苦的道理總能領會，小康之家三餐不缺，大人亦不忘把「冇衣食」定為一宗罪，食飯膽敢三扒兩撥，馬上加料藤條炆豬肉。