兩支英超倫敦球隊車路士同熱刺喺星期日嘅英足盃第四圈分途出擊，不過就命途各異，車仔大勝英冠嘅錫周三3:0；不過熱刺就0:2俾水晶宮踢出局，短短四日就跌咗兩隻盃，勁慘！
熱刺今場派出大量副選應戰，不過效果認真麻麻，開波九分鐘已經俾對方前鋒域咸射破大門，到34分鐘又有獲加彼德斯禁區內犯手球被罰12碼，倒戈嘅安祖斯唐辛一射破網。熱刺原本喺完半場前可以追近比分，祖安科夫博到12碼，不過熱刺一眾好波之人唔係傷咗就休息，要由右閘捷比亞操刀，點知佢又「後衞腳」一射出界。雖然熱刺下半場加強壓逼，控球率超過八成，不過始終都係破門乏力，難逃出局命運。
熱刺今場輸波之後，今季兩個國內盃賽都已經出局，可以專注聯賽同歐聯喇。
另一邊廂嘅車路士就繼續回勇，今場對英冠嘅錫周三贏得相當輕鬆。車仔今場有借將希古恩「地標」上陣，原本佢今場有機會開齋，車路士喺26分鐘獲得12碼，主射嘅韋利安原本想將入波機會送畀希古恩，不過後者以大局為重婉拒對方好意，韋利安最後一射破網先開紀錄。
希古恩地標唔射12碼
換邊後車路士繼續佔優，64分鐘靠年僅18歲嘅赫臣奧杜爾禁區內建功領先至2:0，到比賽尾段韋利安射入今場個人第二球，幫車路士大勝3:0晉級16強。