特區政府執行、推動既定政策，每多蝦碌，好似派錢四千咁，居然倒瀉籮蟹，庫務局準備將近一年，一開波就問題多多，笑死澳門啲派錢專家。講到派錢，唔該一早去澳門取經喇。之前又有勞福局之改變60歲至65歲人士攞綜援之年齡，畀民建聯工聯會泛民鬧爆。最後由林鄭特首向民建聯「耍冧」，補發津貼千零蚊算數。還有最搞笑嘅就係陳帆局長，上午到電台極力推銷三隧分流方案，下午就宣佈撤回，以免在立法會投票慘敗。唉吔，劉局長、羅局長、陳局長都背後中箭，都唔講鄭若驊司長嗰筆咯，仲有冇其他局長出來爭「最爛蘋果獎」？
從「中年人」事件及「三隧分流事件」都可以睇得出，特區政府有結構性弱點，因為特首不是普選出來的，沒有選民授權可言，而特首又不是政黨中人，在立法會無當然執政黨支持票，每遇大件事，特首及各局長便要向民建聯工聯會拜票求票，一旦民工聯手反對，特首就要轉軚或跪低，點解特首唔怕泛民反對呢？無他者，在梁振英痛施辣手，接連DQ民主派議員之後，泛民已成議會少數，而泛民每事反對，特首已經預咗，直情當睇唔見，但民工兩黨都反對時，特首就弊傢伙，急忙要會面求救，用乜藉口都做得出。左丁山一向都話立法會內民生派控制大局，泛民與民工都是經濟左派，福利派，兩大陣營一聯手，自由黨與經民聯根本不足重視。林鄭就係利用呢種形勢，強力壓迫商界大戶（五大商會）不反對撤銷MPF對沖，他日設立標準工時，亦會如此；一位中小企商會代表性人物極力反對撤銷對沖，問左丁山有乜可做，左丁山叫佢慳番啖氣：「形勢比人強，林鄭已經搞掂咗大商會，立法會之商界議員，有邊個會代表中小企發言，林鄭睬你都儍也！」
林鄭諷刺泛民「妒忌」當然係風涼話，但特首「心直口直」講真話啫，民工與泛民直情係親疏有別，再遇到泛民與民工一齊反對，林鄭梗係故意鬆章畀民工，等佢地宣傳：「爭取成功」啦，點會益泛民啫。如果來一個怪招，泛民支持隧道分流方案，支持陳帆局長，你估政府會唔會撤回條例草案呢？泛民議員成日畀政府玩，不如嚟一次調轉角色，見到民建聯反對之事，泛民一致支持政府，奇兵突出，先至唔會成日捱打，被特首奚落！