羅致光今日收了律師信未？
鼓吹「六十歲中年」就業，羅致光句句有骨，指「長者」（乜忽然又唔係中年咩）就業，有助經濟能力之外，其社交、精神健康、自信心等等都有幫助。
唔使對號入座都知，全香港最游手好閒超過六個月冇搵工那位「中年」，唔係唐英年而係佢手指指「你呃人」那位。呢位中年非但唔搵工，悶出鳥來唯恐天下不亂，密密fb打小報告，向學者、網媒發律師信。這個「待業」中年，對羅局長翻白眼，事關眾所周知佢櫃桶收埋冇申報的五千萬，當然不屑政府扣減雞碎咁大把的二百蚊，就算送關愛共享那四千銀上門，都會冷笑一聲，四千？拎去捕殺野豬吧啦！
據聞智商160的羅致光自詡是邏輯語言的用家，很可能是想隱晦踢爆，暗示那位中年，寧願養花種菜玩fb，有工唔恨do，唔使審，其人的社交、精神健康與自信心三項，唔慌正常！為了證明自己的線沒有黐膠咗，這位中年，鼻翼賁張，目露兇光，提早向林鄭挑機，若果他再度當選，會炒羅致光60大鑊！