青年事務委員會去年升格為青年發展委員會，副主席由不時爆金句嘅華置主席劉鳴煒擔任。叫人少啲去日本嘅劉鳴煒，雖然畀人嘅感覺係「離地」，但佢喺青發會成立後，都落區「貼地」了解年輕人。
指落區了解年輕人
劉鳴煒喺「香港開電視」節目《開嚟見我》中話，自己喺會內負責「本地溝通」，所以有走入18區包括學校同年輕人面對面交談，佢留意到有啲中學生比較怕醜，會照稿讀，自己會叫對方丟棄草稿，隨心而談。
今年38歲嘅劉鳴煒，預告準備兩年後交棒（留意番，唔係講緊華置事務……），畢竟屆時差不多40歲，而從事青年事務，除咗本身要了解青年，亦要好多精力同魄力㗎喎，所以希望未來兩年，可以交棒畀更年輕、更有為、更有精力嘅人，去落區了解年輕人。
訪問中，佢又分享年中收到唔少電郵應徵申請，話啲申請者似乎覺得申請好容易，「只是按一下申請及寄出電郵，卻忽略真正了解工作條件或公司背景」，自爆都試過有應徵者「No Show」，詳情如何？就要睇今晚播出嘅節目嘞！