「守護公義基金」去年為協助被DQ議員同佔中九子等籌募訟費，首次喺維園年宵攤位舉行籌款活動，獲唔少市民慷慨解囊，六日年宵共籌得超過31萬元。
陳健民即席寫揮春
基金今年再接再厲，會陪巿民送犬迎豬，喺維園年宵乾貨第8號攤位（近網球場清風街入口）為市民送上「金豬獻瑞」揮春同慶團圓港式年畫，仲會有佔中發起人之一嘅戴耀廷教授著作《抗爭》、環保袋等供市民選購。
佔中九子案4月9日有裁決，佔中三子都面對入獄風險，但佢哋三位都會現身攤位，目前外訪嘅陳日君樞機亦會撐場。據知戴教授會喺攤位為購買著作嘅讀者喺新書上簽名，另一佔中發起人陳健民亦會喺攤位為市民寫揮春。
基金信託人之一嘅何秀蘭同八方講，香港出現越嚟越多嘅政治檢控官司，所以今年嘅豬年字畫同揮春背面都會交代返基金嘅受助案件，包括理大教授鍾劍華俾梁振英控告誹謗、可能要上訴嘅佔中九子案，以及前立法會議員姚松炎被律政司上訴追討訟費一案，所以希望巿民今年繼續多多捐款支持。