財政司司長陳茂波噚日學娥特喺facebook開live，為預算案進行公眾諮詢，話要「正面接波」，佢仲請嚟藝人王祖藍擔任客席主持，但勢估唔到最甘嘅波餅，係嚟自王祖藍，王一開波就話政府起大白象工程就鬼咁鬆手，派錢、收緊綜援又搞到怨聲載道，「點解錢幾百億幾千億送出去，綜援派錢又計住」，令到市民感覺好似「𠼮契弟」咁。
認低威自言「抵鬧」
面對王袓藍正面抽擊，波波惟有認低威，不停為派錢搞到一鑊粥道歉，自言「抵鬧」。有別於娥特由一班創新辦心腹傍住開直播，波波要回應市民批評之餘，仲要應付突然化身民意代表嘅王祖藍，王仲為網民總結諮詢嘅重點意見，話新移民、大白象工程都係焦點所在，更重要係政府好似聽唔到民意咁，「唔想食咁多波餅，真係貼地啲，真係做，唔係Ｘ噏」。
王祖藍喺直播尾聲又應網民要求，點算收到嘅「嬲嬲」數目，結果超過九成表情符號都是「嬲嬲」，王形容啲「嬲嬲」已經上到眼眉，食波餅食到暈嘅波波，就自嘲佢收到嘅「嬲嬲」多到「沒頂」，八方希望波波知恥近乎勇，做好呢份預算案。
《蘋果》記者之後再致電王祖藍，問佢何以為陳茂波fb live做主持時，他以短訊回覆：「其實我一直都有關心社會新聞，平時同啲朋友見面，都會討論吓相關嘅嘢。咁今次財爺邀請，我覺得我應該好好把握呢個機會向香港政府表達我同我身邊人嘅諗法。」講到唔少網民表示「嬲嬲」，祖藍話：「證明大家都關心香港。」不少人鬧爆政府派4,000元嘅「關愛共享計劃」混亂失當，王祖藍都話個派錢方法梗係錯漏百出啦，「財爺自己都話『抵鬧』，即管睇吓之後有冇改善」。
李八方