經IQ爆燈嘅羅致光局長一提，「中年人」突然間成為標籤。前幾日坐港鐵由沙田去紅磡，頭等車廂內碰到博士S，原來佢亦係與左丁山一樣去威爾斯醫院見過醫生教授之後，唔捨得出錢坐的士直飛中環嘅。博士S好似羅局長咁理性，還有不搭的士嘅非金錢理由：「現在中午坐的士過海，要經兩條隧道，必定塞車，到達中環之前，又會在信德大廈前東行或告士打道西行塞車，博唔過，坐港鐵出城好過。」博士S講得好啱，可惜美中不足之處就係外號「失蹤綫」之沙中綫，由廖秀冬局長時代開始講，至今還未能通車，現在受阻於紅磡站豆腐渣工程事件，未完之工程復工無期，不知何日可完工。博士S笑曰：「大約等到我可以攞到一張綠色八達通，兩蚊搭火車之時就掂嘞。」博士S幾多歲呀？佢話：「啱啱係中年人，好似特首話齋，仲係打得做得！」
唔好啩，咁咪要等多五年？博士S讀理科，並唔係工程科，對紅磡站螺絲釘事件，冇專業意見，但以科學講法嚟講，佢認為港鐵與政府實在不懂得從大局着想，既然不少人對禮頓工程有懷疑，對港鐵及政府之工程監督標準有懷疑，就應該一早快刀斬亂麻，將有疑問之平台全部拆晒，火速重建，花費不過幾億元，便可釋公眾疑慮，至於責任問題，將拆卸及重建之全部過程，拍電影咁樣留低錄影紀錄，作為證據，之後咪搵晒有關連人等，慢慢審查囉。依家搵個調查委員會出嚟，中間還是要拆平台檢查，一路發現螺絲釘不合標準，怎麼辦？公眾信心已失，找一個英國教授話平台冇事夠安全，當然會引起另類意見，糾纏落去變成學術口水戰，最終還是要修修補補，費時失事，工程費用更高昂！還未傾完，已到紅磡，左丁山趕時間往嶺南會所飯局，急急腳行人，博士S就慢條斯理入去K11醫肚先。
上咗車去中環，收到藝術B短訊，佢之工業大廈畫室之獨立水錶，搞足一年，卒之獲得水務署正式檢驗批准，鬆咗一口氣。搞工業單位獨立供水，都要搞足一年？香港政府部門效率慢唔慢啲呀？唔抵得，以此問建築邢，佢話：「自從議員狙擊水務署鉛水問題之後，水務署驗水非常嚴格，郁吓都唔批，如果判頭唔熟如何驗水，驗兩三次先至及格都唔奇，咁就搞好耐㗎嘞！」於是問地盤總監惡佬明，如何可以驗水容易pass？惡佬明話：「浪費食水就得嘞，開行新水喉，每日開足十小時，開足幾日先至請水務署驗水，咁就容易過關！」