看，女明星是萬萬不能隨便拿來開玩笑的，前天專欄胡亂寫了一篇李麗華，她立即就顯靈了，星期六搭原定下午六點零從成田機場開出的航班返港，結果因為天氣影響一改再改，卒之搞了三粒幾鐘尚未啟航，年輕的你或者不知道，李女士名作之一叫《誤佳期》啊，大概不高興唔識世界的超齡頑童噏得就噏，特登整鑊誤機期畀過我歎。這天風和日麗，預早三小時乘地鐵出機場，沿途還考慮要不要換位，免得背後射進來的陽光太猛烈，抵達後如常臨別濕平，過了海關省起有間寄文化推廣於做生意的「歌舞伎門」，已有兩三年不曾幫襯，一找鋪位沒有變，左看右看玩了一輪，才氣定神閒走去閘口。預定登機時間已過，廣播公佈延遲，我去櫃位問地勤小姐點解，她用有冇搞錯的神情望我一望，理直氣壯答：「正話落大雪，跑道需要融冰啊！」吓，有件咁嘅事？為何我會懵然不察？搥胸頓足不是因為誤時誤刻，而是錯過了難得遇上的日本雪景。
做人至緊要實際，查清楚航空公司不提供在地晚餐，二話不說便到最靠近的快餐店食麵，唔慌好味沒有問題，好過餓到手騰腳震。飽暖免不了思淫慾，呃，唔講你唔知，後生嗰陣撞正類似狀況何止處變不驚，仲有艷遇㖭噃。那是上世紀末的威尼斯馬可波羅機場，去到發現飛往羅馬的班機取消了，理由非常神秘，雞鴨交涉終於搵到機位，但要等漫漫四個鐘頭。正盤算睇書好定飲茶好，忽然見同樣淪落水鄉的意大利靚仔發出眼球電報，一拍即合多講無謂，凌波微步邁進半私人空間成其好事。唉，人不風流枉少年，俱往矣。