上星期五嘅英足盃第四圈重頭戲曼聯作客阿仙奴，紅魔看守領隊蘇斯克查繼續復古，用番傳奇領隊費格遜以前鬥阿仙奴最叻嘅防反戰術，賽前仲播2009年歐聯4強片教路，結果紅魔成功靠兩次快攻得手，喺阿聯酋球場贏3:1出線16強，蘇B上台後保持所有賽事八戰全勝，認真巴閉。
山神倒戈開紀錄贏3:1
自費Sir退休後，曼聯嘅三任正式領隊都好想建立一隊全新曼聯，但結果都唔掂，嚟到舊將蘇B接手就全方位復古，咁當然又有以前費Sir嘅助手菲倫出山幫手，所以直情好似費格遜教緊咁。今場作客兵工廠，蘇B排出月中作客1:0贏熱刺嘅4-4-2鑽石形中場陣式，只係前鋒變咗盧卡古同阿歷斯山齊士，亦改由羅美路守龍。加盟紅魔後第一次喺阿聯酋球場倒戈嘅山神，31分鐘就接應今場靠右翼嘅盧卡古靚直線，突破越位扭過施治射入，兩分鐘後曼聯嘅快攻又嚟料，盧卡古靚傳連格冷靜射入，而阿仙奴喺43分鐘由奧巴美揚門前整番粒追近。
為咗貫徹防反，唔係齋守唔攻，蘇B喺72分鐘換入拉舒福特同安東尼馬迪爾，再加快啲反擊，82分鐘後者就喺一次突擊幫曼聯埋齋贏3:1出線，蘇B上任後八戰全勝。阿仙奴今場仲有中堅柏柏斯達夫普路斯同哥斯尼傷出，領隊艾馬利話兩個都要等檢查結果先知唞幾耐，哥斯尼仲可能下顎骨折㖭。
蘇B牙擦：諗出邊個都頭痛
講番場波，曼聯入第2、3球都係反擊，今場控球率更只得37%，蘇B話佢賽前特登播番09年歐聯4強次回合，曼聯作客3:1擊潰兵工廠嘅片段，等魔兵學吓今場應該點踢。10年前，曼聯挾1:0優勢作客兵工廠，早段靠朴智星同基斯坦奴朗拿度（C朗）喺反擊各入一球，就咁大局已定合計贏4:1入決賽。蘇B話曼聯人才濟濟，淨係諗出邊個都頭痛：「今場我睇到一隊更全面嘅曼聯，結構更緊密，同贏熱刺嗰場唔同，嗰場係迪基亞救全家。呢種係曼聯嘅經典快攻，我哋以前對阿仙奴成日咁贏，朗尼、C朗同朴智星就係嗰場經典賽事嘅主角，我1997年都試過防守角球後靠快攻入波㗎。」