今夏喺巴西舉行嘅美洲國家盃周四就完成咗分組賽抽籤，大熱嘅巴西就喺A組，而阿根廷就喺B組面對巴拉圭、哥倫比亞同卡塔爾，據報自從世盃出局後就未入選過嘅隊長美斯將會回歸，以今次美洲盃作為國家隊生涯最後一次衝擊冠軍嘅機會。今屆美洲盃同以往有啲唔同，除咗10支南美隊可以參賽之外，另外兩個名額就改為邀請亞洲嘅日本同卡塔爾參賽。周四嘅抽籤星光熠熠，就連巴西名宿朗拿甸奴都有出席，不過大家焦點除咗放喺森巴兵團之外，亦有阿根廷份。事關今年6月就32歲嘅王牌美斯，咁多年國際賽都食白果，自從18年世盃16強出局之後，美斯至今都未曾入選過國際賽大軍，不過教練史卡朗尼就表示一直有同美斯保持聯繫，亦相信佢終有一日會歸隊。