車路士（圖）喺周四英聯盃4強就憑互射12碼淘汰熱刺，將會喺決賽同曼城爭冠軍。首回合先落後0:1嘅車路士，去到周四嘅次回合返到主場，面對住前線天殘地缺嘅熱刺，上半場就靠尼高路簡迪同夏薩特建功，車仔總比數反先一球。不過熱刺換邊後表現有起色，由洛蘭迪接應丹尼路斯傳中頂入追成1:2。不過之後兩隊都再冇波入，車仔次回合贏2:1，兩回合計就同熱刺打成2:2平手，要互射12碼決勝負。
互射12碼頭兩輪，熱刺同車路士球員都順利射入，但之後熱刺有艾歷迪亞主射高出，而車仔嘅佐真奴費路就冇甩拖，最終再有阿列沙巴拿加撲出盧卡斯莫拉嘅射門，幫球隊互射12碼贏4:2，晉級2月24日舉行嘅決賽。
話說車路士新借入嘅前鋒希古恩今場都成為球迷焦點。雖然呢位阿根廷前鋒已經31歲，但初登英超嘅佢相當受球迷歡迎，今場佢就雖然趕唔切落場，不過就喺開賽前15分鐘喺史丹福橋首次亮相，同主場球迷打招呼，一眾車仔球迷都相當熱情咁打氣，相信都等唔切想睇佢上陣喇。
