周四喺阿聯酋舉行嘅亞洲盃八強，中國隊喺中堅輪流派膠下，0:3慘敗畀亞洲1哥伊朗出局，亞盃後離隊嘅納比都冇晒符，成70歲嘅「銀狐」，只能夠嬲到半場喺更衣室掟嘢發洩。中國足總喺2017年制定嘅「假大空」《中國足協2020行動計劃》，亦都幾乎提早宣佈全部失敗！
中國今場有納比愛將張琳芃停賽，所以後防有人腳變動，面對伊朗球員又承受唔到大賽壓力下輪流出事，18分鐘中堅馮瀟霆應付伊朗長傳，竟然控落嚟後嘆慢板，俾伊朗前鋒阿斯蒙偷波，再傳畀空晒嘅達利米輕鬆開紀錄，而馮瀟霆28分鐘就被換走，由前鋒肖智入替。雖然納比決定加強攻力，點知三分鐘後，中堅劉奕鳴又犯類似嘅錯誤，被阿斯蒙靠速度後上爆開，單刀推過門將顏駿凌射入。伊朗半場輕鬆贏兩球後放軟手腳，但完場前國足輪到中堅石柯犯錯，又係長傳出事，佢控個波落嚟竟然甩腳畀咗達利米，後者輕鬆傳畀安沙列法特單刀埋齋，伊朗最終贏3:0，下個禮拜一四強硬撼日本。
吞伊朗三蛋鄭智喊晒
輸畀伊朗唔失禮，但輸得咁肉酸就係問題，賽後暗示話退出國家隊嘅38歲老隊長鄭智就淚灑球場，仲話咁樣輸波好唔甘心。至於約滿嘅教練納比就話唔會續約，而佢喺記招就以感冒為理由唔答問題，只係自己發一輪脾氣就走︰「我嘅中國旅程，呢場波係結尾，我盡力改善呢隊波，好希望用更好方式去結束。我哋喺亞洲盃有啲波踢得幾好，但咁樣犯錯好難接受。我感謝球員們嘅努力，但唔會係今晚。」據悉納比變聲原因並非感冒，而係半場時鬧球員鬧到咁，成70歲嘅銀狐據報仲嬲到喺更衣室不斷掟嘢，事關佢喺賽前反覆強調，呢場波最緊要係杜絕低級失誤，點知球員當晒耳邊風。
三年計劃幾全軍覆沒
眾所周知國家主席習近平有個足球夢，佢喺13年做咗主席之後，足總就提出過好多次改革，中超等等都有過翻天覆地嘅變動，但就同國家隊成績冇乜關係，而足總喺17年制定嘅2020計劃，就大多數都失敗，包括U20世盃同U17世盃參賽資格、U23亞錦賽入8強、亞洲盃入4強同埋參加東京奧運，只係得番踢奧運仲有機會，其他都全數失敗。一日唔真正搞好青訓，掛住吹水發夢，中國隊嘅成績都幾難有進步。