睇蘋果動新聞（1月19日）講流感肆虐，公立醫院內瞓在走廊通道加床嘅病人，要就地以尿兜解決大小二便，全無私隱及尊嚴，真係慘到極，成日話香港係世界城市，點知香港公立醫院似係非洲難民營，上至林鄭特首，下至醫管局行政總裁，都應向市民叩頭道歉。
伊利沙伯醫院早有一位梁醫生網上帖文：「香港人不要老，不要病」，聞者心酸。大編輯近星期去伊利沙伯探病，見到有人帶埋輕巧摺凳去病房，膽粗粗問一句：「阿嬸，自己帶摺凳嚟做乜？」阿嬸厲佢一眼：「你未嚟過㗎？大房病床相隔只有一兩寸，凳都擺唔落，我自己帶凳嚟搵空位，希望可以坐低呀，我唔可以長時間企㗎！」聽落又係幾淒涼。
公立醫院嚴重缺乏醫生護士，人盡皆知，相信係護士大量出走逃亡之故，大編輯係財經版專家，留意到有一間上市公司提供「個人護士服務」，聲稱有近一萬個護士可以做「自由人」（freelancer），有錢病人如需要私家護士在家照顧，可以搵呢間上市公司介紹。成一萬個有資格護士available？大編輯話：「如果聲稱屬實，就講明咗有好多好多護士不願在公立醫院服務，或回家湊仔女，但又肯做parttime兼職。」
公立醫院護士搞到要上街示威，林鄭就走咗去Davos欣賞雪景，話知你，而醫管局就慌忙提高護士津貼，希望熄火，唉，人地唔示威你就唔增加津貼，即係鼓勵示威啫！好似長者津貼呢件事咁，民建聯工聯會發火，林鄭就轉軚，又係鼓勵反對派以後盡量發火。或者話泛民反對，發火都冇用，要民建聯工聯會同時都撞火先至得。此則當然親疏有別，林鄭有意為民建聯工聯會增加聲勢，做場大戲，等民建聯工聯會可以在蛇齋餅糭之外增加票源，鞏固票倉也。
講番醫院，大編輯慨嘆伊利沙伯醫院已成重災區，但九龍中只有兩間大醫院，其中廣華拆卸重建，壓力落晒伊院，有乜辦法唔死！而廣華醫院地盤最近停擺，話搵到古蹟喎，建築界人士估計一停工程，就會為時四五個月，因建築署依家程序為本，工程為次，一有事故，必先停工，調查完再申請開工，中間審批時間起碼三四個月，建築費用因而大升，建築署唔會理，醫院十萬火急，更是關人鬼事，最緊要係議員老爺捉唔到錯處。左丁山日前往港怡醫院驗身，只見醫院地方大，儀器新，護士人手充足，人人做事唔駛匆忙，可以樣樣仔細問清楚，與伊院威院相比，差天共地。如果左丁山有後輩做伊院護士，都會勸佢辭職，申請港怡一份工啦！仍然留在公院嘅直情係為人民服務，值得市民尊重尊敬！