卡迪夫城新兵伊美利安奴沙拿，周一搭嘅小型飛機喺英倫海峽墜機，至今仍然下落不明，英國警方研究過手機訊號同衞星圖像之後仍然冇收穫，於是警方就發聲明，決定終止搜救行動。一眾喺英超落班嘅阿根廷兵，同埋沙拿原先效力嘅南特，都喺社交網站呼籲英國當局唔好放棄，繼續搜救。雖然墜機事件到𠵱家已經幾日，沙拿同機師生還嘅機會微乎其微，英國警方亦決定放棄繼續喺大海搜索，不過一眾阿根廷兵仍然希望當局盡最後努力，阿古路就話：「一切仲有希望㗎，希望當局唔好放棄搜索。」沙拿家姐Romina亦指唔會認為細佬已經離世：「伊美利安奴係個戰士，佢唔會放棄，我哋都唔應該放棄。」至於南特訓練場門口仍然有大批球迷為沙拿獻上祝福（圖），球會亦向英國警方呼籲繼續搜救，又指球會上下同沙拿同在。