皇家馬德里繼續喺盃賽發威！周四西盃八強首回合，佢哋就靠隊長沙治奧拉莫斯梅開二度，主場以4:2先贏基羅納一仗。坐鎮主場嘅皇馬今場係先落後，開賽七分鐘就被基羅納嘅安東尼羅辛奴先拔頭籌，不過盧卡斯華斯基斯好快就幫皇馬扳平，完半場前再有拉莫斯操刀射入12碼，幫球隊反超前2:1。換邊後到皇馬被罰12碼，馬高斯洛蘭迪禁區內爭頂時犯手球被吹罰，基羅納把握呢個機會追成2:2平手。呢個時候隊長拉莫斯再次挺身而出，喺77分鐘接應馬些路傳送，頭槌一頂入網，為球隊領先3:2，亦係佢今場嘅第二球。其後皇馬有賓施馬埋齋，首回合以4:2先下一城，下個禮拜就會作客出戰次回合。同日另一場賽事，愛斯賓奴就喺主場被貝迪斯1:1逼和。