布里斯班獅吼（圖）喺星期五對西悉尼流浪者嘅澳職賽事就上演咗一齣「球迷奇遇記」，喺落後兩球嘅情況下最終驚險逼和對手2:2。近10場都未贏過嘅獅吼今場對住同樣勁頹嘅西悉，表現一樣係無乜起色，喺18分鐘同42分鐘分別俾對方嘅保尼華斯亞同卡華美耶保亞各入一球，未完半場就已經落後0:2。換邊後雖然獅吼有起色，不斷狂攻對手但依然入唔到波，喺大家都諗住獅吼又輸一場嘅時候，去到補時階段奇蹟就出現喇。當踢到補時兩分鐘嘅時候，布里斯班獅吼先由杜比亞斯米基臣追番一球，但仲未係最終比數，因為去到最後一分鐘，西悉門將贊積杜域喺處理一個毫無威脅嘅長傳時，竟然突然自己控咗個波出底線輸角球，結果獅吼憑呢個意外得嚟嘅最後一擊，由阿當泰加特接應角球頂入成2:2完場，驚險執番一分。