舊年以九龍社團聯會健康大使之名搶閘宣傳嘅建制派陳凱欣，最終勝出11.25九西補選，佢嘅選舉開支申報噚日出爐，仲記得當日九龍社團聯會用健康大使之名為佢搶閘宣傳，租起紅磡一大廈的外牆廣告傲視殯儀館，仲大賣小巴廣告等等，八方以為選舉開支必然很「和味」，點知佢申報嘅總開支埋單只花了146.2萬元，低過選舉上限36萬元，因為佢用健康大使牌頭搞嘅一切宣傳，完全冇計入去，而佢用最多係選舉廣告，共使咗97萬元作選舉廣告，當中最奇嘅係，有發票寫明佢用咗9,200元印20萬張「掌心雷」模擬票卡，以佢10.6萬得票計，平均1.8張掌心雷就為佢賺得一張選票㗎喇。
另外，開頭唔認建制派嘅陳凱欣，選舉開支申報顯示好多建制派有幫佢，包括所有當區建制派樁腳都有為佢廣發錄音宣傳，多個議員辦事處以及深水埗南昌區居民商戶聯會等地區組織，都有租借地方予她貼海報、存放物貨。
論撐醫護短片 彈出彈入
唔係睇番選舉開支，可能大家都忘記咗佢係議會新貴，事關佢當選兩個月好少發言同接受訪問，但佢噚日突然埋立會咪兜，大談醫院因為流感搞到「幾乎淪陷」，仲話問題在於病人分流方法「喺呢幾年」都冇特別改變到，其實佢冇做食衞局政助兩年唔夠，乜講到好似唔關佢事咁嘅？之後佢又評論醫管局發出藝人為前線護士打氣嘅短片，先話局方「出發點係好嘅」，跟住又話短片「離地」，言論彈出彈入，呢啲係咪叫又要威又要帶頭盔呢？
李八方