運輸及房屋局局長陳帆上任以嚟，成個局就頻頻「闖禍」。最新鮮一單就係運房局facebook專頁「運房點線面」噚日下晝跟風學人玩「10 year challenge（十年挑戰）」，拎咗兩張聲稱係2009年同2019年嘅港鐵路線圖出嚟做對比，仲形容「十年嘅發展，令整個網絡更加完善，同時與內地接軌，為香港帶嚟更多新機遇！」專頁管理人hashtag埋鐵路迷，似乎想吸引一班鐵路迷注意。
不過幅圖出街幾分鐘，就有鐵路迷發現運房局專頁幅港鐵路線圖有問題啦。有網民直指，專頁2009年嘅路線圖入面漏標咗「輕鐵」，新界西北面成個輕鐵網絡唔見咗；仲有網民向運房局挑機，質疑兩鐵2007年合併之後，路線圖上面就有標輕鐵同深圳地鐵標示，反而好想知運房局幅圖點樣嚟。卒之專頁管理人都要覆番網民「即將作出修訂」。