上周刑滿出獄嘅前特首曾蔭權，呢段時間應該嘆咗好多杯咖啡，盡情享受重拾自由嘅快樂。一班煲呔時代嘅特首辦前夥計周三晚羅漢請觀音同前老闆洗塵，除咗兩任特首辦主任譚志源同梁卓偉、曾為前新聞處長嘅發展局局長黃偉綸、前新聞統籌專員何安達等，唔少政務官都有出席。
有「政敵」雪中送炭
攜同曾太出席嘅煲呔席間分享獄中睇咗好多靈性書籍，最感動係唔少市民寫信寄卡畀佢以示支持，自爆過往不時鬧佢嘅「政敵」，有人都放低政見雪中送炭，八方據聞當中有民主派重量級人士。
有時啲嘢真係好奇怪，可能要有所比較先發覺舊嘅可能已經好好。據知煲呔席間都話𠵱家出親街有好多市民同佢打招呼，幾乎係做官咁耐最受歡迎嘅時刻。唔知佢係咪自嘲？八方聽起上嚟只覺有啲悲涼。出獄變出院嘅煲呔透露身體仲有啲小毛病，但並無大礙；除咗一啲短途trip，未來兩三個月主要留港休息吓。