周五場亞洲盃八強，南韓會出戰卡塔爾，比賽喺南韓時間晚上10點開波，正值電視台黃金時段，所以國內電視台要直播賽事，就令原定時間播出嘅節目要讓路。不過，禮拜五要停播嘅係近期喺南韓hit爆嘅神劇《天空城堡》，令唔少網民大感不滿，仲搞到南韓足總要喺社交網站道歉，究竟發生咩事先？
事緣係南韓收費台JTBC熱播神劇《天空城堡》原定喺禮拜五、六播出最後兩集，但因為JTBC係今次亞洲盃南韓國內獨家直播電視台，所以當日劇集會停播。電視台已經安排咗禮拜六播番尾二一集，不過大結局就要順延到下個禮拜先播，一眾劇迷梗係冇癮。
原定今周播大結局
《天空城堡》內容係講一班南韓嘅名門望族，點樣用盡方法將下一代送入名牌學府，反映南韓對學歷嘅追求，引起唔少人共鳴，又因為劇情𥧌迴路轉，成功牽起一波追劇潮，上個禮拜六播嘅第18集，收視已經突破22%，取代早兩年hit爆嘅《鬼怪》，成為南韓收費電視台有史以嚟電視劇收視之冠，預計大結局呢兩集會再創新高。所以唔止南韓國內一片哀鳴，世界各地唔少劇迷都因為冇得睇而覺得世界末日咁！
南韓足總有見及此都非常識做，喺各個官方社交網站都出post向一眾劇迷道歉，指因為要直播國家隊比賽，所以令《天空城堡》停播引起不便而講對唔住。常言道，識睇一定睇留言，唔少劇迷就用番劇集嘅經典對白「你確定可以承擔這樣的後果嗎？」質問電視台，確定佢哋係咪可以承擔後果，亦有唔少劇迷覺得電視台咁樣吊癮實在太過份。
如入決賽要再停播
不過心水清嘅網友就發現，其實亞洲盃決賽喺南韓時間下禮拜五夜晚11點開波，所以如果國家隊順利打入決賽，《天空城堡》幾乎100%要再停播，咁究竟應該支持國家隊定想佢哋出局呢？其實大家都知，追劇只係一時，但係南韓已經有59年冇贏過亞洲盃，相信國民都會支持球隊打到入決賽兼贏埋冠軍凱旋嘅。