首名在任期間結婚兼懷孕嘅立法會女議員容海恩（圖），終於剖腹誕下B女。八方噚日中午向葉劉淑儀打聽，佢話容海恩噚日已經生咗嘞，係囡囡嚟，又話開刀生產過程順利，仲睇咗容傳來嘅BB相，但暫時難講BB似媽媽容海恩，定爸爸袁彌昌多啲，不過就話BB一定靚㗎啦，因為父母都咁靚喎！
至於容海恩嘅好姊妹、工聯會麥美娟（Alice）就同八方講，佢好替容海恩高興，不過Alice噚日又要開立會大會，晚上又要開居民會，所以無辦法去探望對方。而容海恩助理之後同八方講，BB女重3kg，又話多謝各位關心和祝福，容海恩好快會帶BB同大家見面。