流感高峯期下，公立醫院內科病房持續逼爆，前線護士忙到連去廁所同食飯都冇時間，星期日（20日）先喺政府總部外搞集會，大控訴壓力爆煲，今個星期六（26日），兩大公院醫生工會更將會喺伊利沙伯醫院搞申訴大會。面對醫護壓力咁大，食衞局局長陳肇始、醫管局理應有啲實際行動回應，點知醫管局噚日向員工發電郵，佢哋回應員工辛勞嘅行動，竟然係搵班明星拍片打氣！呢啲咁離地嘅做法，唔止網民鬧爆，連導演彭浩翔都係fb暗嘲一番。
醫管局YouTube頻道近日上載咗六條題為〈全城集氣‧為醫護打打氣〉短片，有譚詠麟、陳慧琳、楊千嬅、謝雪心、C AllStar成員On仔和球星葉鴻輝亮相，其中楊千嬅曾在公院任職護士。醫管局仲預告之後會再上載薛家燕、羅家英等名人打氣片段。
網民鬧爆何不食肉糜
雖然六條片在YouTube的總點擊率至今不超過5,000次，傳播能力暫時有限，但網民反應以負面為主，有網民亦斥「政府大把錢！加人手啦X街」、「何不食肉糜」，有個別醫生亦覺得呢啲片可笑，完全牛頭唔搭馬嘴，而彭浩翔喺fb轉載此新聞，留言暗嘲醫管局冇對症下藥，「明星講完，前線醫護人員即刻鬆X晒啦肯定」，八方之後再搵彭浩翔回應呢啲片，佢話最大諷刺係搵咗一班相信冇乜點樣去公立醫院睇醫生嘅人，去替一啲公院醫生、前線醫護人員打氣，佢覺得呢個係香港政府，一個逆思維嘅方法。
李八方
