禮拜二上演嘅亞洲盃16賽事又上演加時大戰，南韓同巴林喺法定時間打成1:1平手，最後「太極虎」靠後備入替嘅金珍洙頂入奠勝球，以2:1擊敗對手，八強將會對住以一球小勝伊拉克嘅卡塔爾。有孫興民在陣嘅南韓半場佔盡優勢，但要直至43分鐘，先由黃喜燦打開缺口。易邊後太極虎繼續控制大局，可惜一次意外足以致命，77分鐘，巴林球員無視有南韓球員倒地繼續進攻，後備入替嘅前鋒艾曉巴丹接應隊友傳送射門，南韓守衞洪喆護空門趕喺白界前清走皮球，但都俾巴林嘅艾曼羅哈補射入網追平1:1。兩軍之後未能喺90分鐘內「解決」對手，比賽進入加時，直至105分鐘，李鎔右路高波傳中，伏兵門前嘅金珍洙一頂入網，為球隊鎖定2:1勝局晉級。