【黑鏡線索】
早一兩年，公司處於谷底，當時睇過其中兩本書，同一個作者Ryan Holiday，一本叫《The Obstacle is the Way》，另一本叫《Ego is the Enemy》，唔係正式上下集，但可當作如是觀。
呢兩本，有諗過加入之前嘅年度推介，但最後都冇，因為好難講出點解好睇，我硬係形住，呢兩本有啲雞湯味嘅書當時睇得有感覺，係因為自己當時嘅心理需要，而過後我又唔得閒翻睇，所以本書對其他人有冇幫助，我信心唔係好大。
《Ego is the Enemy》講述點樣唔好畀ego分別喺出道、高𥧌同低谷隊冧自己。Ego呢個主角，喺本書裏面係軟性嘅，呢點唔難理解，因為好似普遍都認為ego係少少虛，或者虛少少都冇所謂嘅概念。估唔到上個月睇姚崢嶸嘅書評，而引起我興趣嘅一本書，會令我更認真思考ego呢樣嘢。
以下未必準確代表本書嘅內容比例，我只係抽出比較引發思考嘅幾個關鍵問題。
第一，有個論點，係consciousness同ego係兩回事。只不過「意識」同「自我」對大部份人嚟講，都係長期重叠，所以經常以為係同一樣嘢。
先當係真，而自我係喺意識嘅上面，咁下一個問題係，如果有方法調低個意識，會去一個乜嘢嘅境地？要知道嗰個係乜嘢光景，一個方法，係睇吓聲稱去過嘅人，返嚟嘅遊記，有啲乜嘢共同嘅敍述。
自我越低 越能感受其他人
歷史上聲稱去過嘅人唔少，我理解當中包括佛陀同Steve Jobs，一點共通嘅講法，係當個自我調校得越低，就越感覺到同其他人、甚至同天地萬物有連繫，個empathy推到好大，所有嘢最後都係愛。而當自我完全熄咗之後，唔係乜嘢都冇，而係純粹淨番意識，係一個同平時好唔同嘅狀態。
咁首先點解會有自我？換句話問，自我有乜進化上嘅作用？一個講法係，自我嘅功能，係收窄同過濾身體眾多系統收到嘅大量訊息，令人可以用最慳力嘅方法，用過去經驗累積嘅思考模型，去解決每日生活所遇到困難。而呢種模式，喺生存過活嘅角度嚟講，係非常有效率。
當自我降低，腦裏面本來被區間開嘅區域，會由窄頻溝通變成寬頻溝通，所以出嚟嘅感受，同平時咁唔同，情況就如有synesthesia（聯覺）嘅人，我聽陳輝陽講過佢見到音符嘅顏色，亦聽過有心算異常快嘅人，天生係將數字聯想到唔同形狀、顏色，甚至質地。
咁即係話，其實唔係得一種狀態，除咗有日常生活，個自我正常運作嗰種，仲有個自我調到好低，或者調到好高嘅狀態。大部份人，冇門路將個自我掣調高調低，換句話講，即係基本上到死嘅一刻，都從來只係喺狀態頻譜裏面嘅一段窄頻裏面活過。問題係，有冇乜嘢時候，其實可以進入其他頻譜係一件好事？
旅人另一個共通點，係絕大部份，都話冇自我嘅經驗，係一生中最重要、最有啟發嘅經驗。甚至應用喺治療方面，用於令絕症病人坦然面對死亡，同對抗各種上癮症嘅案例，有明顯幫助。
咁點樣控制個自我掣？呢方面資訊坊間其實從來不乏，據稱有林林總總嘅方法，而經腦電波掃描證實嘅方法，比較多人用嘅有靜坐、祈禱、特別呼吸、某類蘑菇等等。矽谷不嬲係美國其中一個喺呢方面行得最前嘅地帶，沉寂一輪之後，近十年有復蘇迹象。本書叫《How to Change Your Mind》（Michael Pollan），𠵱家雖然一月都未過，但幾可篤定，將會喺我嘅2019年度最有趣書單中上榜。
撰文：宋漢生