祖雲達斯星期一喺意甲主場以3:0輕鬆擊敗基爾禾，以九分優勢繼續排榜首，不過球王基斯坦奴朗拿度（C朗）今場唔單止冇入波，仲射失咗12碼，追平埋美斯所射失嘅12碼次數紀錄，大家都去到25次，Super！
3:0爆「基」艾基利照撐
祖記今場開波13分鐘，就由杜格拉斯哥斯達嘅遠射先開紀錄，完半場前再有安利簡恩接應保羅戴巴拿嘅助攻，射入轉會後首個入波，幫祖記領先至2:0。換邊後早段，基爾禾因有球員喺禁區犯手球被罰12碼，不過C朗主射就俾對方門將蘇蘭天奴撲出，好彩祖記喺84分鐘再有魯加尼頂入，三分袋袋平安。
雖然C朗今場12碼「宴客」，但教練艾基利賽後就繼續力撐呢位葡萄牙球星，仲話呢場比賽唔重要，就算射失都冇所謂：「12碼從來都唔包入，一樣有機會射失！」艾基利又話，C朗可能心急想入波，所以發揮唔到最佳表現。C朗家陣以14個入波，同森多利亞嘅加利亞雷拉、阿特蘭大嘅杜雲沙柏達齊排意甲射手榜榜首，又難怪佢咁心急。
逃稅出庭兩億有找
雖然艾基利話C朗12碼宴客好小事，不過傳媒就唔係咁睇喇，網媒《Bleacher Report》就統計咗C朗同佢宿敵美斯喺職業生涯射失12碼嘅次數（見附表），結果C朗139射有25次射失，而美斯108射亦射失25次。不過以百分比計，C朗嘅命中率有82%，比美斯嘅77%高少少，C朗又贏！
另外，C朗踢完場波後，翌日已經就關於佢涉嫌逃稅單官司，飛去馬德里上庭聽審，仲帶埋女友佐真娜一齊去。據報C朗同法庭達成協議，就佢被控喺2011至14年期間逃稅高達1,470萬歐元，家陣只要交出1,880萬歐元（約1.68億港元）嘅罰款，就唔使受牢獄之災，所以離開法庭時，佢都一樣笑到四萬咁口。