廠商會今年迎來85周年，推出八大製作，仲決定搞搞新意思，承辦已有15年歷史嘅香港國際教育展，副會長徐晉暉噚日喺傳媒午宴上簡介時都笑笑口話，呢個係廠商會嘅第一次，以往搞開工展會叫展商嚟賣嘢賺錢，搞教育展就係畀知識學生，袋錢落學生袋咁話喎。
呢個教育展將分別喺今年5月同7月，喺香港會議展覽中心舉行，廠商會希望用佢強大嘅業界網絡，幫學生搭路，做過東華三院總理同東華不少學校校監嘅會董施榮恆都有幫手搞教育展，佢話目前忙緊聯絡學校參展，但最重要係諗計吸引多啲學生到場。除咗教育展，廠商會仲將會冠名贊助由香港電競總會主辦嘅全港公開電競比賽，年底亦會組團訪京。