肥仔K跟初創公司去拉斯維加斯擺檔參加CES（消費電子展，全世界最大型同類展覽），辛苦四天後回來，話大開眼界，因為CES有全球大小公司參展，觀眾有18萬人，2019年全世界有乜新型新款新發明電子產品，全部在現場展示，故此全世界出口商入口商皆蒞臨賭城遊覽參與。肥仔K有感而發：「賭城地方大，酒店多，能一下子容納18萬遊客，參展客，實在容積驚人，香港點有能力與拉斯維加斯競爭所謂MICE生意？或者澳門賭場酒店有地方可以試吓？」18萬人同一時間到達，對酒店房間需求極大，相信澳門都冇符，香港更唔使講，我地呢個城市已經地方用到盡，日日陷於飽和狀態，淨係土瓜灣已經因遊客太多而叫苦連天啦！
蘋果日報訪問土瓜灣酒樓老闆，引出金句：「唔通要我開棺材舖！」左丁山為之拍案叫絕，在土瓜灣開棺材舖，一定畀「偉恆昌」居民鬧死，會有連番抗議，民政事務局當然唔會批准。戊戌年有不少大名人逝世，名人個個在香港殯儀館出殯，老闆蕭先生賺幾多錢冇人知，但當其他小人物去世呢？原來搵日子出殯甚艱難，代理人花招甚多，冇佢哋從中賺佣幫忙，自己去問嘅話，想話揀個日子為先人出殯，唔使旨意，根本冇得揀，只有「等等等」！一位朋友嘅親人逝世，辦喪事便令佢知道香港開多幾間殯儀館都會做唔切！同樣係「容積不夠，要擴容」。左丁山同佢講，期望有新型、大型殯儀館出現，或者要等到「明日大嶼」計劃成功，有多餘土地先至得！
扯得遠了，肥仔K在CES現場領略一樣嘢，就係「日本」、「韓國」等國在CES現場，皆有大招牌標示，令人知道韓國館、日本館所在，香港旅發局就有Hong Kong巨型招牌，但本港其他企業各散會場東西，幾難令人知道香港參展商在何方。好彩勝在觀眾多，參觀者川流不絕，都有幾百人在肥仔K攤位留下名片及查詢。肥仔K話創辦人及「拍拿」被邀上酒店房傾生意或開會，佢就個人獨守，突有幾十個法國買家/投資基金殺到，好彩國際語言係英文，大家溝通無礙。佢話法國人好想追上美國科技創意及發展力量，有龐大代表團到處參觀查詢，連佢地間小公司小攤位亦不放過，要肥仔K詳細解釋smart chip內容特點及應用範圍，學習興趣十足。肥仔K問左丁山點樣睇法國，左丁山以為法國人一向創意無敵，設計一流，但法國社會經濟制度傾向保護既得利益，不利青年人發展潛能，馬克龍想改革就立即招來大禍，法國有志者最好移居外地，例如來香港！