賀歲煙花匯演將於下月6日年初二晚8時上演，新一年係豬年，自然用豬做主題，而最出名嘅本地豬，恐怕非麥兜莫屬，所以賀歲煙花用咗麥兜動畫音樂做配樂。
今年賀歲煙花匯演由三艘躉船喺維港發放23,888枚煙花，歷時約23分鐘，分8幕。當中第二幕《豬年大吉》會加入豬鼻圖案，又用動畫麥兜《仲有最靚嘅豬腩肉》做配樂，而首幕煙花《歡樂年年》會有金元寶及8字圖案。其實12年前嘅豬年賀歲煙花都有「豬鼻」，又係用同一首麥兜歌曲作配樂，負責設計煙花嘅製作公司行政總裁毛偉誠解釋，因為適合賀年嘅配樂唔多，所以用同一首歌，至於豬鼻，其實同12年前有啲唔同，當年用兩個圓圈代表豬嘅鼻窿，但效果唔理想，所以今年轉為兩個圓點做鼻窿，令圖案更清晰。
另外尖沙嘴星光大道即將月底重開，毛偉誠冇刻意就星光大道重開而改動躉船擺放位置或煙花設計，又話煙花發放至維港上空多個位置，總之企喺海邊就一定睇到。