周日亞洲盃16強賽事中國對泰國，國足喺半場落後一球下終以2:1反勝晉級。國內傳媒報道，佢喺今場比賽賽前，泰國國家隊主帥斯里薩克約耶達有古怪行為，喺球場草地上放置多枚硬幣，隨後被中國方面嘅工作人員發現，向球證舉報並收番啲銀仔。斯里薩克約耶達搞邊科真係幾令人頴頭，唔知會唔會係迷信行為，甚至係一啲神秘陰招。不過就算冇邪嘢，喺球場上放銀仔，對喺場上比賽嘅球員亦都存在一定危險，國足可以贏波，多少都係工作人員機警。
國足自從喺04年嘅亞盃決賽周之後，喺過去三屆亞盃，加上亞運會甚至亞青賽，代表隊喺所有級別嘅大賽都從未喺淘汰賽贏過波，對住曾喺13年大炒佢哋嘅泰國，好多內地傳媒同球迷都唔太睇好國足。
反勝泰國八強撼伊朗
到比賽開始國足一度陷於劣勢，半場落後一球，易邊後去到64分鐘，老牌教練納比換入肖智同金敬道加強攻力，即刻就收到效果。67分鐘肖智接應鄭智傳中頭槌攻門畀對方門將撲出，佢隨即衝前補中扳平。兩分鐘後，郜林又喺禁區博得12碼，之後佢親自操刀射入成2:1奠勝，協助國足殺入八強。
國足入八強，國內傳媒同球迷梗係高興，個個都大讚納比下半場作出神調動，又話38歲嘅隊長鄭智今場跑足全場，仲交出一次助攻，要向呢位老兵致敬。《上海青年報》仲大字標題「國足下半場如紅色狂飆 天賦平平但絕不繳械」大讚國足鬥志可嘉，唔知仲以為佢哋贏咗冠軍。
不過國足開心過後，又要為八強做準備，佢哋下場將會硬撼伊朗，睇吓國足又會用咩方法破關啦！
日本1:0挫沙地
至於周一另一場16強賽事，日本喺20分鐘就憑後衞冨安健洋頂入致勝一球，以1:0擊敗沙地阿拉伯。呢一球係冨安嘅第一個國家隊入球，佢仲刷新咗隊友堂安律上星期先至更新嘅亞洲盃最年輕入球者紀錄。
