難道上海、北京、杭州、武漢、長沙、廈門……沒得買Armani、Chanel、Dior等等的唇膏？何解化妝品櫃臺前試口紅的同胞萬頭攢動？
好似眾高官咁講：人地畀錢你賺，仲要嫌棄？
咁樣講；除咗畀人民幣我地賺，北方小姐的身形、面貌與打扮着實比今時今日節節下退的港女開胃，有同胞充斥，港人外表平均分真係高多幾皮。
從滿耳普通話、上海話、閩南語充斥的高鐵歸來，轉乘地鐵過港島，車廂上依然北語耳內打轉；未止，一直陪行到銅鑼灣站，穿越Sogo上地面，原想圖個安靜，在Food Hall喝杯咖啡，做點工作；想我思維仍停留在Sogo的八、九十年代，過去旺中帶靜已演變成旺旺旺旺旺角。
放棄昔日Sogo嘆咖啡的概念，撤退返回地面，經過化妝品牌林立的一層，犀飛利；以為自己企立在上海或北京任何一所百貨商場，全部、幾乎全部購物者無人操港話，名正言順回晒歸。不單止，身材樣貌，衣裝打扮，都比頭髮染得紅、棕、金、面口浮腫，一律在冬天穿上瘀色羽絨褸、運動套裝粗鄙打扮的港女高幾皮，此刻心情起伏，暗驚香港真的家道已中落，連過去港人引以為傲的外表、氣質冚扮爛輸到無影無蹤。
內地同胞來港購物消費本來集中在5．1、10．1等等幾個黃金周，自由行發展下來基本上日日都係黃金周。來到5．1、10．1、聖誕節、新年、農曆年前後起碼超過兩個星期，香港更加人山人海，鎖定目標已非中環、銅鑼灣、油、尖、旺、上水，充斥給錢香港人賺的同胞已與港人同享沙田、荃灣、屯門及元朗各大商場。從商場及購物街開始，香港被體驗不止「商業殖民地」，事實整體已過渡全面回歸，無暇等多三十年；何止Sogo這個例子？整條廣東道、整間InterContinental酒店……都無謂唏噓，讓我們抱擁同胞的地段例子多不勝數！