經常喺立法會向民主派發炮嘅民建聯蔣麗芸，成日搞到議事廳滿載笑聲……雖然有時啲笑聲係有啲恥笑成份。噚日元秋又嚟料，佢出席政制事務委員會議時將炮頭指向身兼委員會主席嘅黨友張國鈞，令緊接元秋發言嘅毛孟靜笑到肚攣。
聶德權毛姨姨做花生友
話說委員會噚日討論有關2020年立法會換屆選舉嘅法例修訂，包括啲選舉廣告嘅技術修訂，但元秋發言時盤古初開由民主派2015年否決政改講起，之後又投訴立法會選舉「參賽者」太多，令選舉論壇逼爆，認為政府要研究收緊參選資格，又建議政府改變通宵點票安排令巿民同公務員唔使捱通宵等結果云云。
張國鈞聽到元秋發表偉論就話已經鬆手畀多咗半分鐘佢發言，言談中不無怨言，難怪忍唔住補句：「雖然佢（元秋）講嘅嘢，超出今（噚）日技術修訂嘅範圍」，在席嘅政制局局長聶德權聽到兩位民建聯黨友擦出火花都忍唔住笑；但張國鈞呢句話撻着元秋開炮：「主席，我𠵱家投訴你，我幾時有超出我哋講嘢嘅議題呀？」繼而勒令張國鈞讀出噚日嘅議題︰「你讀吖！」堅稱自己問自己有興趣嘅嘢冇乜唔妥，「我冇超出範圍啊！」
緊接發言嘅毛孟靜聽到元秋偉論笑到肚攣，向主持會議嘅張國鈞話：「唔好意思，哈哈哈哈！笑到我！」反遭炮轟嘅張國鈞都無奈話：「我畀你笑埋先！」毛孟靜其後仲笑住轉身「表揚」元秋：「佢（元秋）真係好有趣、好得意㗎囉！係可愛㗎，係可愛！」
李八方