成立45年嘅廉署，最深入民心嘅肯定係「飲咖啡」，適逢45歲生日，廉署今年嘅宣傳廣告一改以往阻嚇性方向，首度以咖啡做主題，仲喺電視同電台、巴士及港鐵車站播出以咖啡做主角嘅廣告，而且睇廣告仲會聞到咖啡味，大家試過未？
據知宣傳片嘅拍攝團隊搵勻幾十個代表唔同年代、唔同款式嘅咖啡杯放滿一張長枱，連咖啡壺都要精挑細選，無非係要為大家帶嚟視覺享受；仲搵嚟「音樂情人」鄭子誠旁白，以輕鬆嘅語調由介紹香濃咖啡從而帶出廉潔訊息，令大家耳目一新。
喺港島區人流較多嘅巴士站，好似北角港運城同銅鑼灣維園咁，當廉署沖咖啡廣告片播放時，更加會散發香濃咖啡味，一如入場睇4D電影咁，等路過嘅人精神為之一振。