泛民係咪有少少妒忌？
林鄭成隻死貓塞畀泛民啃。世界上沒有無厘頭的恨，但有觸動紅線的妒，睇吓：
將十字架「下架」唔畀送去澳門的順豐速遞港區經理，事件曝光後集團即刻出招，決定經理被引咎辭職。上帝就係要凡夫俗子妒忌，只有奶媽被揀中，被感召，施政不近人情做衰N次都無事。打工仔的少少妒忌，極快散貨，速遞全城。妒忌送上門，入到屋，變大忌。
沙中線居民唔止少少、係比習大大更大大地妒忌林鄭。漏夜撲去7仔搵廁紙買、唔識入閘嘟機的林鄭，永遠唔使靠近目測唔知幾時塌的紅磡月台，官到無求命自長，小市民開始信納，羅致光講緊活到120歲那個人，是指林鄭。超越月台黃線、被新定義為中年的64歲市民，妒忌嗎？喔，粗口被嘟嘟嘟……
前宗主國大不列顛那位97歲菲臘親王，的確少少妒忌林鄭，佢老人家駕駛時翻車，受驚但無受傷。林鄭無牌但夠膽死坐上7百萬人那架列車的司機座，高速駛去明日大嶼。英國慢搞脫歐，香港失控脫軌，邊樣更大劑？