【爆相爆片】陳貝兒前年宣佈離婚回復單身，寄情工作。日前，讀者王先生透過《蘋果》嘅「爆相爆片」，見到陳貝兒揸白色保時捷喺跑馬地遇到交通事故。
當日約下午3點幾，王先生坐電車經過，見到陳貝兒架車被一架掛咗「P」牌嘅車撞尾，王先生影相時，有趣地影埋余文樂兩公婆路過，仲見到佢哋眼望望睇熱鬧。相片所見，陳貝兒企喺街邊接受警員查詢，身邊仲有位疑似新歡。馮仁昭聯絡陳貝兒，佢就否認撞車時同疑似新歡同車，佢話當日做完gym，揸車返屋企時發生意外，就打畀朋友幫手，強調呢位「救駕男」係普通朋友，自己仍未脫單。
第一次見面
陳貝兒噚日喺灣仔出活動，透露座駕撞花少少，對方已賠償，再強調「救駕暖男」唔係新歡：「因為熟車嘅朋友唔多，我係打電話畀一個朋友，佢就介紹呢個朋友嚟幫我手，所以呢個朋友我都係第一次見。」問到有冇同「暖男」聯絡，佢話：「有，但都係關於車。」知唔知對方有冇另一半？佢笑言：「未問喎，可能有㗎。」提到出事時遇到余文樂，陳貝兒話：「以前做嘢訪問過佢，嗰個朋友影相好有角度同構圖，可以攞獎，張相有聲有畫。」
撰文：馮仁昭