一向以極左言論出位嘅工聯會會長吳秋北，試過因為批評法官係「社會罪人」，搞到連娥特都頂佢唔順，要公開表示遺憾。早前聖誕節吳秋北又發表「毛誕論」，話毛澤東誕生125周年先係中國人嘅聖誕節，仲話最好嘅紀念就係向老毛學習。
列文革 大饑荒死亡人數
白鴿黨副主席羅健熙為咗表揚吳秋北呢位同志心繫共黨、獨尊毛毛，早前不惜奉獻珍貴嘅橫額位置印上吳秋北嘜頭，再簡介毛主席「偉績」，包括文化大革命令約200萬人死亡、大饑荒令3,200至4,500萬人餓死，以及反右運動令140萬人被迫害等。
不過被「表揚」嘅吳秋北明顯唔受落，噚日就喺facebook撰文，話「白鴿黨羅某副主席為挽救其低迷的知名度，竟以我去年fb上言論為其刷存在感」，話羅健熙以攻擊「偉人」抬高自己身價，「實在太可恥可悲」，仲鬧埋早前報道事件嘅《明報》「臭味相投，沆瀣一氣」。
羅健熙睇到吳秋北咁鬧佢，就話吳同志為求回應佢，竟然抹殺咗毛主席嘅「偉績」，實在非常悲哀！羅健熙仲指當日各大傳媒都有報吳秋北嗰啲誇張荒誕言論，如果報道就等如同流合污，「大家以後唔同意吳同志的言論就千萬勿報」。其實如果羅健熙橫額內容有乜唔啱，吳同志大可講出嚟，但佢喺fb帖文又完全隻字都冇，莫非佢都認為橫額嘅內容無法反駁？
李八方
