德國第五級別聯賽球隊高洛彭堡上個月就委任前德國女子隊國腳胡賓賀絲做教練，不過德國傳媒就以佢嘅性別作為提問焦點，令胡賓賀絲都忍唔住寸班記者，仲令佢聲名大噪。雖然德國近年連國家總理都係由女性出任，不過喺當地球壇嚟講，胡賓賀絲呢位女性教練始終相對新奇，傳媒提問焦點依然會落喺性別度。
胡賓賀絲早前接受訪問時，就被問到當佢走入去更衣室嗰陣，佢啲球員需唔需要着返條褲，胡賓賀絲都真係冇咁好氣，惟有答一個最「爆」嘅答案反諷記者：「佢哋梗係唔需要着返褲啦，我咁專業，會以球員下體大細去揀邊個有得落場。」
雖然胡賓賀絲呢個回應擺明係寸個記者，不過最後都俾當地傳媒大造文章，似乎德國體育傳媒喺性別思想方面都唔係想像中咁開放喎。